Co va quei …?

Co va quei …?

Damondas e rispostas

Regiun e populaziun

Vegn la populaziun integrada els process da decisiun e da concessiun?

La populaziun ha la pusseivladad da far valer sia influenza duront differentas fasas dil project:

  • Contracts da dretg da baghegiar denter las vischnauncas e l'altaventa surselva SA (votaziun ellas vischnauncas)
  • Adattaziun dil plan directiv regiunal (exposiziun publica)
  • Revisiun parziala dil plan d'utilsaziun (votaziun ellas vischnauncas)
  • Lubientscha da baghegiar (exposiziun publica)

Tgei han la populaziun e las vischnauncas d'in tal project?

Las vischnauncas e la populaziun san profitar en differenta moda d'in parc da vent en Surselva. La sedia dalla firma a Lumbrein generescha per l'ina taglias. Per l'autra san las vischnauncas profitar dil dretg da baghegiar. Era la participaziun ei pusseivla. Per construir il parc da vent vul ins risguardar surtut interpresas localas. Plinavon scaffeschan ins novas plazzas da lavur qualificadas per la gestiun dil parc da vent. 

Forza electrica e tecnica

Conta electricitad vegn producida?

Ins quenta cun ina producziun da tochen 70 GWh ad onn. Quella producziun d'electricitad corrispunda al consum da ca. 15'000 casadas svizras mesaunas.

Co vegnan ils implonts d'energia da vent colligiai cun la reit naziunala d'aulta tensiun (sur tiara, sut tiara)?

Igl encablament intern dil parc e la transmissiun dall'energia als puncts planisai per alimentar la reit succedan sut tiara. La varianta Tavanasa han ins gia examinau. Ina varianta alternativa che alimentescha la reit a Lumbrein vegn sclarida actualmein cun l'OE Lumbrein e cun Repower. La via per alimentar la reit fuss cheutras in toc pli cuorta. Plinavon profitass la Val Lumnezia d'ina megliera stabilitad dalla reit.

Ambient ed agricultura

Caschuna la construcziun d'implonts d'energia da vent donns irreparabels?

Intervenziuns ella natira san ins buc evitar. L'energia da vent ha denton igl avantatg che quellas ein relativamein pintgas. Gia duront la fasa da construcziun sesprovan ins da schanegiar igl ambient il meglier pusseivel. In implont d'energia da vent ha ina durada da veta da 20 tochen 30 onns. Tut tenor basegns san ins remplazzar igl implont cun ina megliera maschina. Sche nus duvrein in di buca pli quella fuorma d'energia, vegn igl implont demontaus e reciclaus (90% san ins reutilisar gia oz). La part veseivla dil fundament vegn renaturalisada. Aschia resta aunc la via da gera che sa vegnir duvrada vinavon per las alps. 

Ein regiuns dignas da protecziun pertuccadas?

Ella planisaziun dil parc da vent fan ins attenziun da buca tangar regiuns schurmegiadas. Sche quei ei buca pusseivel dapertut, vegn ei agiu a moda specialmein precauta ed el rom dall'examinaziun ecologica.

San ils animals pascular vinavon sin las pastiras d'alp?

Igl ei vinavon pusseivel d'utilisar il territori ton per ils implonts d'energia da vent sco per l'agricultura. Duront la fasa da construcziun sa ei dar restricziuns. Experienzas en Svizra, Austria e Tiaratudestga muossan che l'utilisaziun parallela sco territori d'agricultura e da recreaziun funcziunescha fetg bein.

En nies cass ha ei gia dau discussiuns cun tut ils pertuccai: proprietaris d'alp, cultivaturs ed igl Uffeci d'agricultura dil Grischun. El rom dall'examinaziun ecologica vegn quei sectur elaboraus pli approfundadamein.