Stadi dil project

Stadi dil project

Igl emprem implont d'energia da vent vegn construius il pli baul il 2019

Stadi dil project

Mesiraziuns da vent

Dapi il november 2010 vegn il vent mesiraus ella regiun dil parc. Quella campagna da mesiraziun dil vent ei bein la pli vasta en Svizra. Ella ha cuzzau tochen il 2014 ed ha cumpigliau petgas da mesiraziun sin Staviala Vedra, Grenerberg, Scharls e Cavel (80 m, 60 m, 10 m mobil), apparats LiDAR sin il Scharls ed apparats SODAR sin l'Alp Nova.

Ils resultats ein vegni harmonisai en il rom d'ina cumparegliaziun a liung temps cun il parc da vent Andermatt Gütsch e cun includer datas da vent geostroficas.

Per quella lavur fetg pretensiusa han ins incumbensau dus experts accreditai independents (Meteotest CH, Berna e GEO-NET Umweltconsulting, Hannover). Las minimas differenzas dallas prognosas cumprovan l'aulta qualitad dalla datas disponiblas risguardadas e dils differents models da calculaziun applicai.

Resumaziun: Cun risguardar implonts d'energia da vent cun in grond diameter da rotur ed ina moda da construir concentrada e cumprimida (95% dil vent SV/N), sa il Parc da Vent Surselva vegnir gestiunaus en moda economica! Aschia vegn il perimeter dil project limitaus fetg.

Logistica

Il 2014 ei l'expertisa logistica vegnida fatga dalla renomada firma da transport Prangl, A-2345 Brunn-Gebirge. Quella garantescha a nus da saver transportar era gronds implonts d'energia da vent (3 – 4 MW) ella regiun da nies parc da vent!

In'ulteriura sfida ei la construcziun digl implont d'energia da vent cun la tschaghegna. La soluziun per quei problem vegn dalla firma Max Bögl cun il sistem dalla tschaghegna da reiver e la moda da baghegiar cun moduls.

Contracts da dretg da baghegiar

Ils 19 da zercladur 2012 ha l'administraziun communala da Castrisch approbau cun gronda maioritad il contract da dretg da baghegiar cun l'altaventa surselva SA. Suenter la fusiun cun la vischnaunca gronda da Glion il 2014 cuntinueschan ils discuors d'informaziun ussa cun quella.

Las autoritads communalas da Lumnezia e da Sursaissa ein vegnidas informadas currentamein davart il stadi da nies project. Las contractivas per las eventualas cumpensaziuns en connex cun il dretg da baghegiar ein en elavuraziun.

ICF (Indemnisaziun per cuvierer ils cuosts dalla furniziun d'electricitad) 

Sin igl 1. d'october 2014 ha la Swissgrid communicau all'altaventa surselva SA che las premissas per l'indemnisaziun per cuvierer ils cuosts dalla furniziun d'electricitad tenor art. 7a dalla lescha d'energia (LEn) ein ademplidas per tut ils implonts d'energia da vent planisai!

Ils proxims pass – examinaziun ecologica

Il carnet da duers en connex cun il rapport dall'examinaziun economica per la procedura dil plan d'utilisaziun «Parc da Vent Surselva» ei vegnius approbaus ils 16 d'october 2013.

Il proxim pass prevesa ina revisiun parziala dil plan d'utilisaziun. En quei rom succeda era l'examinaziun ecologica che interquera, sch'il project corrispunda allas prescripziuns davart la protecziun digl ambient. Il resultat digl examen ei ina basa per decider davart il project. L'examinaziun ecologica risguarda las influenzas sin igl ambient duront l'entira durada dil project, aschia che la lavur sa vegnir optimada cuntinuadamein ord il punct da vesta dalla protecziun digl ambient.

La firma CSD Ingenieure AG, Tusaun, accumpogna nus en quei sectur. Ei ha gia dau discussiuns cun la Staziun ornitologica svizra da Sempach, cun igl Uffeci per la natira ed igl ambient, partiziun catscha e pesca, sco era pertuccont la protecziun dils miezmiur e miezutschi. Las differentas expertisas vegnan elaboradas el decuors dil 2016. Il rapport final cun ils resultats dall'examinaziun ecologica vegn allura exponius publicamein.

Il medem mument sclareschan ins differentas damondas el sectur dil turissem.